Kontsumobidek berriro jarri du arreta “tasa arrosa” deituriko fenomenoan; hau da, gizonei edo emakumeei zuzenduta egotearen arabera antzeko produktu edo zerbitzuek izan ditzaketen prezio-desberdintasunetan.
Benetako zerga bat ez bada ere, kontzeptu hori erabiltzen da emakumeentzako merkaturatutako produktu batzuek prezio handiagoa dutenean azaltzeko, nahiz eta gizonezkoentzako baliokideen ezaugarri ia berdinak izan. Praktika hori higiene-produktuetan, kosmetikan, lurringintzan, arropan edota zaintza pertsonalarekin lotutako zenbait zerbitzutan ikus daiteke.
Desberdintasun horiek, askotan, diseinuarekin, kolorearekin, aurkezpenarekin edo marketin-estrategiekin lotuta egoten dira, eta ez produktuaren kalitatean edo funtzionaltasunean dauden benetako aldaketekin. Horregatik, kontsumo-erakundeek prezioak alderatzea, etiketak aztertzea eta erosketak egin aurretik produktuen ezaugarri objektiboak berrikustea gomendatzen dute.
Eguneroko kontsumoan desberdintasun horiek izan dezaketen eragin ekonomiko metatuaz gain, fenomeno honek merkatuan dauden genero-estereotipoei eta merkataritza-praktika gardenago eta berdinzaleagoen beharrari buruzko eztabaida ere mahai gainean jartzen du.
EHKBtik gogorarazten da garrantzitsua dela kontsumo arduratsu, kritiko eta informatua sustatzea, azken prezioari ez ezik, produktuak kontsumitzaileei nola aurkezten eta segmentatzen zaizkien ere erreparatuz.