Espainiak 2026ko azarotik aurrera edari ontzientzako gordailu, itzulketa eta berrerabilpen sistema (SDDR) ezarriko du, plastikozko botilak, latak eta gehienez hiru litroko brik ontziak barne hartuta. Europako beste herrialde batzuetan dagoeneko martxan dagoen eredu honek bilketa eta birziklatze tasak nabarmen hobetzea du helburu.
Sistema honen funtzionamendua sinplea izango da: edari bat erosterakoan, kontsumitzaileak gordailu txiki bat ordainduko du —gutxi gorabehera 10 zentimo ontzi bakoitzeko—, eta zenbateko hori berreskuratu ahal izango du ontzia hutsik itzultzean, salmenta puntuan bertan edo horretarako prestatutako makinetan.
Neurri honen bidez, ekonomia zirkular eraginkorrago baterantz aurrera egin nahi da, baita hondakinen sorrera murriztu eta ingurumenaren gaineko eragina gutxitu ere. Halaber, herritarren inplikazioa sustatu nahi da ontzien kudeaketa egokian, berrerabilpena eta birziklapena indartuz.
Hala ere, aldaketa honek egokitzapena eskatuko du bai merkataritzaren aldetik, bai kontsumitzaileen aldetik. Horregatik, EHKBtik gomendatzen da sistema berriaren funtzionamenduari buruz informazioa eskuratzea, ontziak egoera onean gordetzea itzuli ahal izateko, eta gordailua ez kostu gisa ulertzea, baizik eta kontsumo arduratsuago bati lotutako zenbateko berreskuragarri gisa.
Neurri hau Europar Batasunak bultzatutako ingurumen-politiken barruan kokatzen da, hondakinen murrizketa eta kontsumo jasangarriagoa sustatzeko helburuekin bat eginez.