Bigarren eskuko ibilgailu bat erostea aukera ona izan daiteke, baina garrantzitsua da gure eskubideak ezagutzea eta erosketa egin aurretik zenbait neurri hartzea.
EHKBk gogorarazi nahi du, erosketa itxi aurretik, ezinbestekoa dela ibilgailuaren egoera egiaztatzea, dokumentazioa berrikustea eta haren historiari, izan ditzakeen akatsei eta salmenta-baldintzei buruzko informazio argia eskatzea.
Zer hartu behar duzu kontuan erosi aurretik?
* Legezko bermea: enpresa edo profesional bati erosten diozunean, adostasun-berme legala duzu. Bigarren eskuko ondasunetan, epea adostu daiteke, baina ezin da urtebetetik beherakoa izan.
* Informazio gardena: saltzaileak ibilgailuaren egoerari, ezaugarriei eta prezio osoari buruzko informazio argia eman behar du.
* Dokumentazioa: gorde beti salerosketa-kontratua, iragarkiak, fakturak eta saltzailearekin izandako komunikazio guztiak.
* Akatsak edo matxurak: ibilgailuak adostasun-arazoak baditu, zure eskubideak baliatu eta araudiak aurreikusten dituen konponbideak eska ditzakezu.
* Urrutiko erosketak: enpresa bati internet bidez edo establezimendutik kanpo erosten badiozu, oro har, 14 egun natural dituzu atzera egiteko eskubidea baliatzeko, legeak ezarritako salbuespenak kontuan hartuta.
Eta partikular bati erosten badiozu?
Garrantzitsua da jakitea partikularren arteko salerosketak ez direla kontsumo-araudi beraren arabera arautzen, profesional bati egindako erosketak bezala. Kasu horietan, legeria zibila aplikatzen da, eta ezkutuko akatsengatiko erantzukizunak egon daitezke.
EHKBren gomendioa: ez ibili presaka, aztertu ondo ibilgailua, irakurri kontratua sinatu aurretik eta ez izan zalantzarik zure eskubideak urratu direla uste baduzu erreklamatzeko.
Ondo informatutako erosketa erosketa seguruagoa da. Ezagutu zure eskubideak eta baliatu itzazu.