Agencia Española de Protección de Datos-ek ekimen berri bat jarri du abian adimen artifizialaren erabilera arduratsua sustatzeko, arreta berezia jarriz deepfake izenekoetan; hau da, IA bidez sortu edo manipulatutako edukietan, pertsona baten irudia, ahotsa edo keinuak errealismo handiz berreraikitzeko gai direnetan.
Tresna horiek gero eta eskuragarriagoak direnez, arrisku garrantzitsuak sortzen dituzte herritarrentzat, bereziki pribatutasunari, datu pertsonalen babesari, ospeari eta segurtasunari dagokienez. Deepfakeak desinformazioa zabaltzeko, iruzurrak egiteko edo nortasunak ordezkatzeko erabil daitezke, eta horrek areagotu egiten du kontsumitzaileen zaurgarritasuna ingurune digitalean.
AEPDren ekimenaren helburua da, alde batetik, arrisku horien inguruan kontzientzia piztea, eta, bestetik, herritarrei, enpresei eta garatzaileei erabilera desegokiak saihesteko jarraibide argiak eskaintzea. Gomendioen artean nabarmentzen dira eduki susmagarriak identifikatzea, partekatu aurretik jatorria egiaztatzea eta manipulatuta egon daitezkeen bideo, audio edo irudien aurrean arreta berezia izatea.
Halaber, azpimarratzen da beharrezkoa dela datuen babesari buruzko araudia errespetatzea teknologia horien garapenean eta erabileran, bermatuz informazio pertsonalaren tratamendua modu legezko, garden eta seguruan egiten dela.
EHKBtik gogorarazten da funtsezkoa dela ohitura digital arduratsu eta kritikoak garatzea. Etengabe eboluzionatzen ari den testuinguru honetan, ezinbestekoa da kontsumitzaileek informazioa izatea eta prest egotea iruzur edo manipulazio posibleak identifikatzeko, eduki faltsuen zabalkundea saihestuz eta beren datu pertsonalak babestuz.