Kontzertuetarako, jaialdietarako, ikuskizunetarako eta kirol-ekitaldietarako sarrerak Internet bidez erostea ohiko jarduera bihurtu da. Hala ere, eskaera handiak, aurresalmentek, ilara birtualek eta sarrerak azkar agortzeak kontsumitzaileak presaka erostera bultza ditzakete, iruzurrak jasateko edo gehiegizko prezioak ordaintzeko arriskua handituz.
Kontsumobide-Kontsumoko Euskal Institutuak gogorarazten du garrantzitsua dela salmenta-plataformen fidagarritasuna egiaztatzea edozein sarrera erosi aurretik. Zibergaizkileek sarrerak lortzeko premia aprobetxatzen dute webgune ofizialen itxura duten orrialde faltsuak sortzeko edo sare sozialetan iruzurrezko iragarkiak argitaratzeko. Horietan eskaintzen diren sarrerak baliteke existitzen ez izatea edo ekitaldira sartzeko balio ez izatea.
Egoera horiek saihesteko, sarrerak zuzenean ekitaldiaren, aretoaren edo erakunde antolatzailearen webgune ofizialetik erostea gomendatzen da, baimendutako salmenta-plataformak erabiliz. Era berean, ezinbestekoa da webgunearen helbidea zuzena dela egiaztatzea eta esteka susmagarriekin edo dagoeneko agortuta dauden ekitaldietarako sarrerak eskaintzen dituzten iragarkiekin kontuz ibiltzea.
Birsalmenta-plataformen kasuan, kontuan izan behar da prezioak jatorrizkoak baino askoz handiagoak izan daitezkeela. Horregatik, edozein ordainketa egin aurretik, komeni da azken zenbatekoa berrikustea, kudeaketa-gastuak barne, baita itzulketa- edo ezeztapen-baldintzak eta sarrerak izendunak edo eskualdagarriak diren egiaztatzea ere.
Halaber, ordainketa-metodo seguruak erabiltzea gomendatzen da, ahal dela banku-txartelak edo gorabeheraren bat gertatuz gero ordainketa erreklamatzeko aukera ematen duten plataformak. Pertsona ezezagunei zuzeneko banku-transferentziak egitea saihestu behar da. Garrantzitsua da, gainera, enpresa saltzailearen identifikazioa eta harremanetarako datuak egiaztatzea.
Prezio susmagarriki baxuak dituzten eskaintzak, azken sarrerak geratzen direla iragartzen duten mezuak, atzerako kontaketa-erlojuak eta ortografia-akatsak edo informazio osatugabea duten webguneak iruzur posible baten seinale izan daitezke.
EHKBtik gomendatzen dugu erosketarekin lotutako dokumentazio guztia gordetzea, besteak beste, baieztapen-mezu elektronikoak, ordainagiriak, pantaila-argazkiak eta kontratazio-baldintzak. Dokumentu horiek funtsezkoak izan daitezke erreklamazioa aurkezteko, sarrerak jasotzen ez badira, baliozkoak ez badira edo ekitaldia bertan behera uzten bada.
Informazioa izatea, zuhurtziaz jokatzea eta erosketa-baldintzak egiaztatzea ezinbestekoak dira edozein ikuskizunez gozatzeko, kontsumitzaile gisa ditugun eskubideak arriskuan jarri gabe.