
Mailegu bat, hipoteka bat edo banku-gordailu bat kontratatu aurretik, ezinbestekoa da haren baldintzak ezagutzea eta eskuragarri dauden eskaintzak alderatzea. Espainiako Bankuak gogorarazten du finantza-erakundeek aplikatzen dituzten interes-tasak libreak direla eta produktu bakoitzaren ezaugarrien eta baldintzen arabera alda daitezkeela.
Beste edozein erosketarekin gertatzen den bezala, banku-produktuen eta -zerbitzuen prezioa ezagutzeak aukera ematen die kontsumitzaileei erabaki informatuagoak hartzeko eta beren behar ekonomikoetara hobekien egokitzen diren aukerak baloratzeko.
Konparaketa hori errazteko, Espainiako Bankuak hainbat interes-tasari buruzko informazioa jartzen du herritarren eskura, finantza-produktu bat kontratatu aurretik erreferentzia gisa erabil daitekeena.
Alde batetik, interes-tasa ofizialak argitaratzen ditu. Horien artean daude Euriborra eta hipoteka-merkatuaren beste erreferentzia-indize batzuk, diruaren legezko interesa, berandutze-interesa eta Europako Banku Zentralak ezarritako interes-tasak.
Bestetik, finantza-erakundeek aplikatzen dituzten interes-tasei buruzko informazio estatistikoa ere eskaintzen du, bai dirua maileguan emateagatik kobratzen dituzten interesei buruzkoa, bai bezeroen gordailuengatik ordaintzen dituztenei buruzkoa. Datu horiek erakundeek hilero Espainiako Bankuari bidaltzen dioten informazioan oinarrituta prestatzen dira.
Erakundearen Estatistika Buletinean eskuragarri dagoen informazio horri esker, interes-tasen bilakaera ezagutu daiteke, eta erreferentziak izan daitezke banku-erakundeek eskaintzen dituzten baldintzak baloratzeko.
EHKBtik gomendatzen dugu edozein finantza-produktu kontratatu aurretik informazioa biltzea, erakunde desberdinen eskaintzak alderatzea eta baldintza ekonomikoak arretaz aztertzea. Interes-tasaz gain, komeni da komisioei, lotutako gastuei eta eragiketaren guztizko kostuari erreparatzea.
Informazio argia eta egiaztatua izatea ezinbestekoa da presazko erabakiak saihesteko, hartzen ditugun betebeharrak ulertzeko eta kontsumitzaile gisa ditugun interes ekonomikoak babesteko.

