Zibersegurtasuneko Institutu Nazionalak (INCIBE) iruzur mota berri baten berri eman du. Iruzur horrek, batez ere, azken segurtasun-eguneraketak instalatuta ez dituzten iPhone gailuetako WhatsApp erabiltzaileei eragiten die. Zibergaizkileek kaltetutako pertsonen kontuetatik mezuak bidaltzea lortzen dute, haien kontaktuei dirua eskatzeko, kontuen titularrak gertatzen ari denaz ohartu gabe.
Iruzur honen ezaugarri kezkagarrienetako bat da biktimek WhatsApp normaltasunez erabiltzen jarraitzen dutela eta ez dituztela iruzurrezko mezuak beren elkarrizketen historian aurkitzen. Horrek zaildu egiten du hirugarren pertsonak haien kontuak baimenik gabe erabiltzen ari direla hautematea.
Iruzurgileek bidalitako mezuek, normalean, ustezko larrialdi-egoera bati aurre egiteko dirua eskatzen dute, eta transferentzia egiteko banku-kontu baten zenbakia ematen dute. Mezuak pertsona ezagun baten WhatsApp kontutik jasotzen direnez, hartzaileek benetakoak direla pentsa dezakete, eta ordainketa egin dezakete eskaeraren atzean nor dagoen egiaztatu gabe.
INCIBEren arabera, jasotako kontsulten artean iOS 18 baino lehenagoko bertsioak erabiltzen dituzten gailuekin lotutako kasuak dira nagusi, nahiz eta bertsio berriagoetan ere gorabeherak erregistratu diren. Horrek ez du esan nahi sistema horiek dituzten gailu guztiak kaltetuta daudenik.
Arriskuak murrizteko, erakundeak gomendatzen du iPhonearen sistema eragilea eta WhatsApp aplikazioa eguneratuta mantentzea, bi urratseko egiaztapena aktibatzea eta kontuari lotutako gailuak aldian-aldian berrikustea.
Pertsona batek bere WhatsApp kontua baimenik gabe erabiltzen ari direla susmatzen badu, berehala jakinarazi behar die egoera bere kontaktuei, beste komunikazio-bide baten bidez. Era berean, iruzurrezko mezuen frogak gorde eta gailuaren segurtasuna berrikusi behar ditu. Transferentziaren bat egin bada, ezinbestekoa da ahalik eta azkarren bankuarekin harremanetan jartzea, dirua berreskuratzen saiatzeko.
EHKBtik gogorarazten dugu ez dela inoiz diru-transferentziarik egin behar WhatsApp bidez jasotako mezu batean soilik oinarrituta, nahiz eta mezua senide edo pertsona ezagun baten kontutik iritsi. Ustekabeko diru-eskaera baten aurrean, gomendagarria da ustezko bidaltzaileari zuzenean telefonoz deitzea, eskaera benetakoa dela egiaztatzeko.
Gailuak eguneratuta mantentzea, kontuen segurtasuna indartzea eta diru-eskaeren benetakotasuna egiaztatzea funtsezko neurriak dira iruzur digital mota horiek prebenitzeko.